Na male ekrane stiže prva serija iz originalne HBO Europe produkcije u našem regionu, „Uspjeh“. Serija će imati premijeru 6.1., kada će svih šest epizoda biti dostupno gledaocima na HBO GO-u. Istog dana će prva epizoda biti prikazana u 20.00 na HBO kanalu, nakon čega će po jedna nova epizoda biti emitovana nedjeljom u istom terminu.

Scenario potpisuje Marjan Alčevski, jedan od pobjednika HBO Adria First Draft konkursa, a reditelj je oskarovac Danis Tanović.

„Uspjeh” je višeslojna drama fokusirana na snažne likove. Radnja prati isprepletene priče četiri stranca, koji se na svoj način bore sa svakodnevnicom života u gradu, a koje zauvijek povezuje jedan nasilan događaj. Kako posljedice njihovih djela počinju da im se uvlače u svaki aspekt života, ti obični ljudi sa različitim životnim pričama odlučuju da ponovo uspostave kontrolu nad svojim životima. Serija donosi  mračan uvid u različite strukture današnjeg društva kroz životne priče običnih ljudi, koje je isto to društvo gurnulo preko ivice. „Uspjeh” je univerzalna, slojevita priča u kojoj kroz ljubav, posao, porodicu, odanost, nesigurnost i zločin istražujemo trenutno preovladavajuća osjećanja frustracije, bespomoćnosti i pasivnosti u svakodnevnom životu običnog čovjeka u regionu, a i šire.

Glavne uloge igraju Toni Gojanović, Tara Taler, Iva Mihalić, Uliks Fehmiu i Marija Škaričić.